Տղամարդու սեռական օրգաններ

Երեխաները մեծանալու և հասունանալու ընթացքում սկսում են ուսումնասիրել իրենց մարմնի բոլոր մասերը: Ծնողները պետք է ըմբռնումով մոտենան իրենց երեխայի բնական հետաքրքրասիրությանը, որովհետև իր հետաքրքրությունն ու սեփական մարմնի մասերի ուսումնասիրությունը երեխայի զարգացման գործընթացի բնական մասն են կազմում: Ծնողները պետք է խուսափեն երեխային պատժելուց կամ քննադատելուց, քանի որ դա կարող է հանգեցնել իր մարմնի հանդեպ ամոթի զգացում առաջացնելուն:

Շատ կարևոր է օգտագործել մարմնի մասերին համապատասխան անատոմիական ճիշտ լեզու: Մենք մեր երեխաներին սովորեցնում ենք իրենց ձեռքերի, ոտքերի և բերանի ճիշտ անունները, ինչը պետք նաև անենք, երբ խոսքը վերաբերում է սեռական օրգաններին: Ճիշտ տերմինաբանության օգտագործումն օգնում է երեխաներին հասկանալու, որ իրենց մարմնի բոլոր մասերը կարևոր են ու բնական: Այս տերմիններից խուսափելը երեխայի համար կարող է նշան լինել, որ իր սեռական օրգանները տաբու են կամ պակաս կարևոր, ինչն էլ հավանաբար բացասաբար կազդի իր մարմնի պատկերի և սեռական զարգացման վրա: Պետք է երեխային խրախուսել ուսումնասիրելու և ավելի լավ ճանաչելու սեփական մարմինը, սակայն կարևոր է նաև ասել, որ դա պետք է անել մենակ ու առանձին եղած ժամանակ: Սա օգնում է երեխաներին զարգացնելու դրական վերաբերմունք իրենց մարմնի նկատմամբ և նպաստում է սեփական անատոմիայի առողջ ըմբռնմանը:

Ծնողները կարևոր դեր են խաղում իրենց երեխաների ձևավորման փուլում և իրենց աջակցությամբ, նրբանկատությամբ ու անկաշկանդ վերաբերմունքով կարող են օգնել իրենց երեխաներին՝ զարգացնելու առողջ ինքնագնահատական և մարմնի դրական ընկալում:

• Հարց – Արդյոք ճի՞շտ է հեռացնել սեռական օրգանների հատվածի մազածածկույթը:
• Պատասխան – Չկա ճիշտ կամ սխալ, կա այն, թե ինչպես է քեզ հարմար: Ուստի ինքդ պիտի որոշես՝ մազահեռացում անե՞լ այդ հատվածում, թե՞ թողնել՝  ինչպես կա: Միայն պետք է հիշես, որ սեռական օրգանների և ցայլքի հատվածում աճող մազերը բնական երևույթ են, և կարիք չկա դրանք հեռացնելու, քանի որ ունեն պաշտպանողական գործառույթ․ մեղմացնում են հագուստի և մաշկի անմիջական շփման ազդեցությունը: Այնուամենայնիվ, եթե այդ մազերը քեզ խանգարում են, կարող ես եղունգները կտրելու համար նախատեսված մկրատով զգուշորեն կտրատել դրանք: Իսկ եթե որոշել ես հեռացնել, ապա ընտրի՛ր քո մարմնին և մաշկին համապատասխան ու ամենաանվտանգ միջոցը:
• Հարց – Սեռական հարաբերության ժամանակ կուսաթաղանթի պատռվելը մի՞շտ է ցավոտ:
• Պատասխան – Ո՛չ, միշտ չէ, որ ցավոտ է: Կուսաթաղանթի ձևն ու գտնվելու վայրը յուրաքանչյուր կնոջ մոտ տարբեր է: Անգամ լինում են այնպիսի դեպքեր, երբ կուսաթաղանթը առաձգական (էլաստիկ) է կամ ունի անսովոր դիրք ու սեռական հարաբերության ժամանակ չի պատռվում:
• Հարց – Ես վախենում եմ, որ իմ առաջին հարաբերության ժամանակ կուսաթաղանթս չի պատռվի, և արյուն չի գա: Ինչպե՞ս պետք է ապացուցեմ զուգընկերոջս, որ ես կույս եմ:
• Պատասխան – Ընդհանրապես, առաջին հարաբերության ժամանակ կուսաթաղանթը միշտ չէ, որ պատռվում է, ու արյուն է գալիս: Երբեմն լինում են դեպքեր, որ կուսաթաղանթը պատռվում է առանց արյան հոսքի կամ ընդհանրապես չի պատռվում: Կուսաթաղանթը կարող է պատռվել նաև որոշ տեսակի սպորտաձևերով զբաղվելիս կամ տամպոն տեղադրելիս: Ուստի հնարավոր չէ նախապես իմանալ, թե ինչ տեղի կունենա սեռական հարաբերության ժամանակ: Եթե ձեր  հարաբերություններում կա փոխադարձ վստահություն ու հարգանք, ապա զուգընկերոջդ որևէ բան ապացուցելու կարիք չկա: Անկախ նրանից՝ կի՞ն ես, թե՞ տղամարդ, ինքդ պետք է որոշես՝ ունենա՞լ սեռական հարաբերություններ, թե՞ ոչ: Եթե սեռապես ակտիվ ես եղել մինչև ամուսնությունը, ապա դա քո որոշումն է, ու լրիվ օրինաչափ է, ինչը պետք է նաև քո զուգընկերը հարգի: Եթե քեզ համար կարևոր է մինչև ամուսնությունը կույս լինելը, ապա սա ևս քո որոշումն է, ու դա էլ է լրիվ օրինաչափ ու բնական: Եթե առաջին սեռական հարաբերության ժամանակ արյուն չի գալիս, ապա դա դեռ չի նշանակում, որ կույս չես: Ուղղակի մարդիկ հաճախ կուսաթաղանթի և կուսության վերաբերյալ ունեն սխալ պատկերացումներ, ինչը քո մեղքը չէ:
• Հարց – Օրինաչա՞փ  է, որ հեշտոցից արտադրություն է գալիս:
• Պատասխան – Այո՛, օրինաչափ է, բայց պետք է ուշադրություն դարձնել արտադրության քանակությանը, հոտին և գույնին: Եթե արտադրությունը սպիտակավուն է կամ թափանցիկ և չունի սուր հոտ, ապա անհանգստանալու կարիք չկա: Արտադրության հետ կապված փոփոխություններ կարող են լինել դաշտանային ցիկլի ընթացքում, և դա օրինաչափ է։ Եթե արտադրությունը սովորականից ավելի առատ է, ունի սուր ու տհաճ հոտ, սեռական օրգանների շրջանում քոր է գալիս, կամ միզելու և սեռական հարաբերության ընթացքում ցավում է, ապա պարտադիր պետք է դիմել մասնագետի օգնությանը:
• Հարց – Արդյոք օրինաչա՞փ է այն, որ կրծքերի ու պտուկների միջև տարբերություն կա:
• Պատասխան – Ա՛յո, օրինաչափ է: Յուրաքանչյուր մարդու կրծքի ձևն ու չափը կարող է իրարից տարբեր լինել, ու բնության մեջ շատ քիչ են հանդիպում դեպքեր, երբ կնոջ կրծքերն իրարից չեն տարբերվում: Պտուկները ևս կարող են տարբերվել: Որոշ մարդկանց մոտ դրանք կարող են արտահայտված լինել կամ էլ ոչ այդքան, կարող են նաև գույնի ու չափի տարբերություններ ունենալ:
• Հարց – Արդյոք ճի՞շտ է տղաներին թլպատելը:
• Պատասխան – Պետք է հասկանալ, թե դա ինչ նպատակ է հետապնդում: Հաճախ ծնողները կարծում են, որ դա հիգիենայի կարևոր մաս է կազմում, բայց դա այդպես չէ: Ճիշտ չէ երեխայի փոխարեն որոշում կայացնելը․ դա մարմնի անձեռնմխելիության կարևոր հիմնահարցերից մեկն է: Տղամարդու առնանդամի գլխիկի մաշկն ի սկզբանե ավելի փակ է լինում, սակայն ժամանակի ընթացքում այն ծածկող մաշկը հետ է քաշվում: Թլպատելու փոխարեն ուղղակի պետք է հետևել ու սովորեցնել հիգիենայի ճիշտ կանոնները: Բոլոր այն դեպքերում, երբ երեխան բորբոքվածության կամ կարմրության պատճառով միզել չի կարողանում, անհրաժեշտ է դիմել բժշկի:
• Հարց – Որտեղի՞ց է դուրս գալիս տղամարդու մեզը:
• Պատասխան – Ի տարբերություն կանանց, որոնց միզանցքը գտնվում է հեշտոցից ավելի վերև և ունի միզելու համար առանձին հատված, տղամարդիկ միզում են առնանդամի գլխիկում գտնվող միզածորանի ճեղքով, որտեղից դուրս է գալիս ինչպես մեզը, այնպես էլ սերմնահեղուկը:
• Հարց – Տղաներն ունե՞ն կուսաթաղանթ:
• Պատասխան – Ո՛չ, տղաները կուսաթաղանթ չունեն: