Սեռական հարաբերություններ

Հստակ պատկերացում ունենալու համար, թե սեռական հարաբերություններում ինչն է քեզ համապատասխանում կամ, հակառակը, ինչից պետք է խուսափես, պետք է իմանալ սեռական հարաբերության տեսակները: Դա նաև քեզ կօգնի ճիշտ որոշումներ կայացնելու:

Հեշտոցային (վագինալ) սեքս
Այս տեսակն իր մեջ ներառում է առնանդամի ներթափանցումն ու ներհրումը հեշտոց: Այն համարվում է սեռական հարաբերություններում գոյություն ունեցող ամենավանադականը: Սա նաև միակ տեսակն է, որը կարող է հանգեցնել հղիության: Ուստի անցանկալի հղիությունից խուսափելու համար կարևոր է պաշտպանվել:

Օրալ սեքս
Այս տեսակի ընթացքում օգտագործում են բերանը՝ զուգընկերոջ սեռական օրգանները սեքսին նախապատրաստելու կամ էլ ուղղակի հաճույք պատճառելու համար: Չնայած այն բանին, որ այս տեսակն ընդհանուր առմամբ անվտանգ է, այնուամենայնիվ, վարականերից խուսափելու համար պետք է պաշտպանվել:

Անալ սեքս
Սեռական հարաբերության մեկ այլ տեսակ է անալ սեքսը, երբ առնանդամը ներթափանցում է հետանցք: Վնասվածքներից խուսափելու համար պետք  է օգտագործել խոնավացնող քսուք՝ լուբրիկանտ: Պաշտպանվելը նույնպես շատ կարևոր է, որովհետև այս տեսակը սեռավարակների տարածման հարցում ամենավտանգավորն է:

Փոխադարձ ձեռնաշարժություն (մաստուրբացիա)
Այս տեսակի ընթացքում տեղի չի ունենում ներթափանցում: Զուգընկերները դիպչում կամ շոյում են իրար կամ միմյանց սեռական օրգանները: Բացի հաճույք պատճառելուց և ստանալուց՝ այս տեսակը միմյանց մարմիններն ուսումնասիրելու ու ավելի լավ ճանաչելու հնարավորություն է տալիս:

Զուգընկերոջդ հետ խոսելն այն մասին, թե ինչն է իրականում քեզ դուր գալիս սեռական հարաբերություններում, երբեմն քեզ մոտ կարող է անհարմարության և ամոթի զգացում առաջացնել, բայց առողջ հարաբերություններ ունենալու համար խոսելն առանցքային նշանակություն ունի:

Հիշի՛ր, որ անկեղծ լինելը շատ կարևոր է: Կիսվի՛ր այն ամենով, ինչը քեզ դուր է գալիս սեռական հարաբերություններում կամ, հակառակը, դուր չի գալիս․

• Ինձ դուր է գալիս, երբ դու անում ես․․․․
• Ես կուզենայի փորձել․․․

Նախասիրությունների մասին խոսելու համար ցանկալի է ընտրել համապատասխան պահ, երբ երկուսդ էլ հանգիստ եք, և նյարդայնացնող ոչ մի բան չկա:

Բացի քո ցանկություններն ասելուց՝ շատ կարևոր է նաև լսել զուգընկերոջդ նախասիրությունների մասին: Դու միշտ էլ կարող ես հարցնել․

• Ի՞նչն է ամենաշատը քեզ հաճույք պատճառում:
• Ինչպե՞ս կարող ենք անել, որ երկուսիս էլ ավելի հաճելի լինի:

Խոսելիս պետք է կենտրոնանալ քո զգացմունքների և ցանկությունների վրա, այլ ոչ այն բանի վրա, թե զուգընկերդ ինչն է սխալ անում, օրինակ՝

• Ինձ ավելի շատ դուր է գալիս, երբ․․․

Պետք չէ հրահանգներ տալ, օրինակ՝ «Այսպես երբեք մի՛ արա» կամ «Դու միշտ շտապում ես»․ սա շատ նուրբ թեմա է, և հարաբերություններն ավելի լավը դարձնելու համար կարևոր է ապրումակցող լինել:

Համաձայնությունը ցանկացած սեռական հարաբերությունների ամենակարևոր պահերից մեկն է: Այն ամենը, ինչ տեղի է ունենում քո և զուգընկերոջդ միջև, միայն պետք է լինի փոխադարձ համաձայնությամբ: Դա նշանակում է, որ երկուսդ էլ համաձայն եք ունենալու սեռական հարաբերություն և ցանկացած պահի կարող եք փոխել ձեր միտքը:

Համաձայնությունը միայն մեկանգամյա քննարկման հարց չէ, և շարունակական երկխոսությունը պարտադիր է: Կարևոր է հիշել, որ մեկ անգամ «այո՛» ասելը չի ​​նշանակում, որ ընդմիշտ «այո՛» ես ասել: Դու միշտ իրավունք ունես քո սահմանները դնելու, և քո զուգընկերը պետք է հարգի դրանք այնպես, ինչպես դու ես հարգում իրենը:

Անկեղծ ու անկաշկանդ շփում
Երբ բանը հասնում է սեռական համաձայնությանը, անկեղծ ու անկաշկանդ շփումը շատ կարևոր է: Մտքերդ ուղիղ ու պարզ արտահայտելը քեզ կօգնեն ճիշտ ու հստակ ցույց տալու հույզերդ ու զգացմունքներդ: Օրինակ՝ դու կարող ես ասել, որ դեռ պատրաստ չես կամ ուզում ես կանգ առնել ու այլևս չշարունակել: Ցանկություններիդ մասին անկեղծ խոսելը բնական է ու նաև հնարավորություն է տալիս խուսափելու տհաճ իրավիճակներից:

Ոչ մի ճնշում
Յուրաքանչյուրը սեռական համաձայնություն պետք է տա իր կամքով՝ առանց որևէ ճնշման կամ մանիպուլյացիայի։ Եթե ​​զգում ես, որ քեզ վրա ճնշում են գործադրում կամ դրդում են ինչ-որ բանի, ինչին պատրաստ չես, կարևոր է մի քայլ հետ գնալ և մտածել այն մասին, թե իրականում ինչ ես ուզում: Հիշի՛ր, որ դա քո մարմինն է, և միայն դու իրավունք ունես որոշելու՝ ինչպես վարվել դրա հետ: Առողջ հարաբերությունները կառուցված են փոխադարձ հարգանքի և փոխըմբռնման վրա, այլ ոչ թե ճնշման կամ մանիպուլյացիաների:

Մտափոխություն
Սեռական համաձայնության ամենակարևոր կողմերից մեկն այն է, որ դու կարող ես ցանկացած պահի փոխել քո միտքը: Նույնիսկ եթե ի սկզբանե համաձայնել ես ինչ-որ բանի, այն դադարեցնելու իրավունք ունես յուրաքանչյուր պահի: Համաձայնությունը միանգամյա գործարք չէ. այն ձեր փոխազդեցությունների ամբողջ ընթացքում պետք է ստուգվի նորից ու նորից: Հիշի՛ր, որ քո հարմարավետությունը միշտ պետք է առաջնային  լինի:

Անձնական սահմաններ
Ցանկացած հարաբերություններում հարգանքը պետք է երկկողմանի լինի: Միշտ հարգի՛ր զուգընկերոջդ որոշումներն ու սահմանները ճիշտ այնպես, ինչպես ակնկալում ես, որ քոնը հարգեն: Եթե ​​զուգընկերդ այլևս ցանկություն չունի շարունակելու և ցանկացնում է դադարեցնել, ապա պետք է լսել ու հարգել նրա ընտրությունը: Կարևոր է ստեղծել այնպիսի միջավայր, որտեղ երկուսդ էլ ձեզ ապահով և հասկացված կզգաք: Բաց ու պարզ հաղորդակցությունը և միմյանց սահմանների նկատմամբ հարգանքը օգնում են հարաբերություններում վստահություն և մտերմություն ձևավորելուն:

Հիշի՛ր, որ համաձայնությունը փոխադարձ հարգանքի և փոխըմբռնման մասին է: Դա ցանկացած առողջ հարաբերությունների հիմնարար մասն է, և դրան հետևելը երաշխավորում է, որ և՛ դու, և՛ զուգընկերդ ձեզ միշտ հարմարավետ, ապահով և հարգված կզգաք: Երբեք մի՛ վախեցիր բարձրաձայնել ուզածիդ կամ չուզածիդ մասին․ քո ձայնը կարևոր է, և քո ընտրությունը արժանի է հարգանքի:

Առողջ հարաբերությունները ապահով և աջակցող տարածք ստեղծելու մասին են: Դրանք պետք է կառուցված լինեն վստահության, հարգանքի և անկեղծ հաղորդակցության վրա: Առողջ հարաբերություններում զուգընկերներն իրենց գնահատված և հասկացված են զգում:

Փոխադարձ հարգանք
Առողջ հարաբերություններում փոխադարձ հարգանքն առանցքային է: Սա նշանակում է, որ և՛ դու, և՛ զուգընկերդ հարգում եք միմյանց կարծիքները, զգացմունքները և անձնական սահմանները: Դու պետք է հստակ զգաս, որ քո գաղափարներին ու մտահոգություններին լուրջ են վերաբերվում, և որ կարող ես առանց վախենալու արտահայտել մտքերդ ու չմտածել, որ դրանք կանտեսվեն կամ կարհամարհվեն: Հարգել նշանակում է գնահատել, վստահել միմյանց ու չխախտել անձնական սահմանները, և առանց այդ հարգանքի՝ անհնար է հարաբերություններում վստահության և անվտանգության հիմք ստեղծել:

Անկեղծ հաղորդակցություն
Հաղորդակցությունը ցանկացած առողջ հարաբերությունների սիրտն է: Պետք է հարմարավետության զգացում ունենաս, երբ զուգընկերոջդ հետ բաց ու անկեղծ քննարկումներ ես ունենում, վստահ լինես, որ քո արտահայտած մտքերն ու զգացմունքները երբեք չի քննադատի: Սա առանցքային դեր ունի, որովհետև բացի նրանից, որ առանց կաշկանդվելու կարող ես խոսել քեզ հուզող հարցերի շուրջ, նաև քո օրինակով օգնում ու քաջալերում ես զուգընկերոջդ անելու նույնը: Առանց կաշկանդվելու կիսվելը երկուսիդ էլ օգնում է ավելի լավ միմյանց հասկանալու և էլ ավելի ամրապնդելու ձեր կապը: Իհարկե, պետք չէ մոռանալ, որ երբեմն նաև դժվար ու ծանր զրույցներ են լինում, սակայն այս ամենը ձեզ օգնում է միասին աճելու և ձեր հարաբերություններից լիարժեքության ու բավարարվածության զգացում ունենալու:

Հավասարություն
Հարաբերություններում, երբ երկուսն էլ որոշումներ կայացնելու հավասար իրավունք ունեն, իրենք միանշանակ գտնվում են հավասարության մեջ, ինչն էլ միևնույն թիմում լինելու զգացողություն է առաջացնում: Զուգընկերներից ոչ մեկը չպետք է ավելի շատ վերահսկողություն կամ իշխանություն ունենա մյուսի նկատմամբ: Փոխարենը հարաբերությունների վերաբերյալ բոլոր որոշումները պետք է ընդունվեն միասին՝ հաշվի առնելով միմյանց կարիքներն ու ցանկությունները: Անկախ նրանից, թե ինչ ֆիլմ եք դիտելու կամ կյանքի վերաբերյալ ինչ կարևոր որոշումներ եք կայացնելու, երկուսդ էլ պետք է վստահ լինեք, որ յուրաքանչյուրիդ ձայնը կարևոր է:

Աջակցություն
Միմյանց անհատականությանը կամ նպատակներին ու պլաններին աջակցելն առողջ հարաբերությունների կարևոր մասն է կազմում: Սա նշանակում է ոգևորել ու աջակցել իրար ոչ միայն հարաբերությունների ներսում այլև դրանցից դուրս՝ կյանքի տարբեր իրավիճակներում, լինի դա աշխատանք, համալսարան թե հոբբի: Երազանքներին կամ նպատակներին հասնելու ճանապարհին իրար խրախուսելն ու ոգևորելը ամրացնում է ձեր կապը և ցույց տալիս, որ ձեզ համար կարևոր է մյուսի հաջողոթյունն ու երջանիկ լինելը: Այս ամենի հետ մեկտեղ նաև շատ կարևոր է սեփական անհատականությունը պահպանելն ու զուգընկերոջ կյանքի ու հետաքրքրությունների մեջ չտարրալուծվելը։

Անառողջ հարաբերությունների նշաններ
Կարևոր է իմանալ և նկատել անառողջ հարաբերությունների նշանները, որպեսզի հնարավոր լինի վաղաժամ լուծել խնդիրները կամ անհրաժեշտության դեպքում օգնության դիմել: Ահա մի քանի հիմնական բաներ, որոնց պետք է ուշադրություն դարձնել.

Մանիպուլյացիա
Երբ զուգընկերդ քեզ փորձում է վերահսկել կամ ազդում է քեզ վրա այնպես, որ դու քեզ անհարմար, երբեմն էլ ճնշված ես զգում:

Խանդ
Երբ զուգընկերդ չափից դուրս խանդոտ է, դա կարող է բերել վերահսկող վարքագծի: Չափից ավելի խանդը կարող է լինել անինքնավստահության և քեզ չվստահելու նշան:

Ճնշում
Երբ բաներ ես անում ոչ թե քո ցանկությամբ, այլ կողմնակի ճմշման հետևանքով, լինեն դրանք սեռական հարաբերություններ թե ուղղակի միասին ժամանակ անցկացնելը:

Անձնական սահմանների խախտում
Երբ զուգընկերդ չի հարգում անձնական սահմաններդ կամ էլ պարբերաբար փորձում է խախտել:

Եթե նկատում ես այս ամենը, ապա պետք է քայլեր ձեռնարկես: Քո մտահոգություններով միշտ էլ կարող ես կիսվել մտերիմ մարդու կամ տան անդամի հետ, ում հետ քեզ ամենաապահովն ու հարմարավետն ես զգում, կամ էլ կարող ես դիմել մասնագետի օգնությանը: Յուրաքանչյուր դեպքում էլ քեզ կաջակցեն ու կփորձեն հարթել իրավիճակը:

Հիշի՛ր, որ առողջ հարաբերություններում դու քեզ հարմարավետ ու գնահատված ես զգում, և այն քո կյանքը դարձնում է ավելի լավը, մինչ անառողջ հարաբերությունները քեզ անվերջ պահում են վախի, հուսահատության և անբավարարվածության զգացման մեջ: Միշտ առաջնահերթություն տուր քո բարեկեցությանը և մի՛ հապաղիր օգնություն փնտրել, եթե դրա կարիքը ունես:

Անվտանգ սեռական հարաբերությունը կարևոր է քո առողջությունն ու բարեկեցությունը պաշտպանելու համար, որովհետև դրա շնորհիվ հնարավոր է կանխել սեռական ճանապարհով փոխանցվող վարակներն (ՍՃՓՎ) ու անցանկալի հղիությունը:

Առաջին հերթին միշտ պետք է մտածել պաշտպանվելու մասին: Պահպանակներն ու ատամնաբուժական լատեքսային կտորները կարևոր միջոցներ են սեռավարակների վտանգը նվազեցնելու և անցանկալի հղիությունը կանխելու համար: Պահպանակները պետք է օգտագործվեն հեշտոցային, հետանցքային և օրալ սեքսի ժամանակ, մինչդեռ ատամնաբուժական լատեքսային կտորները կարող են պաշտպանություն ապահովել օրալ սեռական հարաբերության ժամանակ:

Անցանկալի հղիությունից պաշտպանվելու համար գոյություն ունեն տարբեր հակաբեղմնավորիչներ: Դրանց յուրաքանչյուր տեսակն ունի իր առավելություններն ու թերությունները: Միայն բժիշկը կարող է քեզ օգնել գտնելու այն իդեալական տարբերակը, որը լավագույնս համապատասխանում է քո օրգանիզմին, ապրելակերպին ու կարիքներին: Հիշի՛ր, որ եթե նույնիսկ օգտագործում ես որոշակի տեսակի հակաբեղմնավորիչներ, միևնույն է, սեռավարակներից պաշտպանվելու համար պետք է օգտագործել միայն պահպանակներ:

Սեռավարակների կանոնավոր ստուգումը անվտանգ սեռական հարաբերություն ունենալու հիմնական պայմաններից մեկն է: Պարբերաբար հետազոտություն անցնելը քեզ կօգնի տեղեկացված լինելու քո սեռական առողջության մասին և կերաշխավորի ցանկացած վարակի արագ հայտնաբերում և բուժում: Սեռավարակներ կան, որոնք չունեն ախտանիշներ, և հենց այդ պատճառով էլ կանոնավոր թեստավորումը մեծ կարևորություն ունի:

Յուրաքանչյուրիդ առողջական վիճակի մասին զուգընկերոջդ հետ անկեղծ զրուցելը անվտանգ սեռական հարաբերություն ունենալու ուղիներից մեկն է, որովհետև այն երկուսիդ էլ օգնում է ավելի պաշտպանված լինելու:

Անվտանգ սեռական հարաբերության մասին տեղեկացված լինելը հնարավորություն է տալիս պատասխանատու ընտրություններ անելու: Օգտվելով անվտանգ սեռական հարաբերություն ունենալու գոյություն ունեցող մեթոդներից, անցնելով սեռավարակների կանոնավոր ստուգումներ և անկեղծ զրույցներ ունենալով զուգընկերոջդ հետ՝ դու կարող ես պաշտպանել քո առողջությունը ու վայելել քո սեռական փորձառությունները:

Սեռական հարաբերությունները կարող են էմոցիոնալ ուժեղ ազդեցություն ունենալ քեզ վրա: Դրանք կարող են փոփոխության ենթարկել ինչպես քո ինքնաընկալումը, այնպես էլ զուգընկերոջդ հանդեպ ունեցած զգացմունքները: Առողջ և լիարժեք կապ ունենալու համար կարևոր է հասկանալ սեռական հարաբերությունների հուզական կողմը:

Սեռական հարաբերությունները շատ հաճախ ուժեղացնում է մտերմության զգացումը՝ խորացնելով զույգի զգայական կապը: Զգացմունքային այս կապը ներդաշնակության և միասնականության զգացում կարող է առաջացնել՝ փոփոխելով ու ավելի ամուր դարձնելով ձեր հարաբերությունները:

Հուզականորեն պատրաստված լինելը կարևոր է։ Նախքան սեռական հարաբերություն սկսելը համոզվի՛ր, որ հուզականորեն պատրաստ ես ու նաև հասկանում ես, թե ինչպես կարող է այն փոխել ձեր հարաբերությունների դինամիկան: Մտածի՛ր զգացմունքներիդ մասին ու քննարկի՛ր դրանք զուգընկերոջդ հետ՝ համոզվելով, որ երկուսդ էլ նույնն եք զգում:

Ձեր հարաբերությունները մի օր կարող են ավարտվել: Դա սեռական հարաբերությունների հուզական կողմերից մեկն է, ու դրան նույնպես պետք է պատրաստ լինել: Բաժանումները կյանքի ընթացքի որոշակի մասն են, և բնական է տխրելն ու հուսահատվելը, երբ առնչվում ես դրան: Բաժանումները երբեմն կարող են ծանր լինել, ու նման իրավիճակում ցանկալի է մտերիմ մարդկանցից աջակցություն ստանալը:

Զգացմունքները հարգելը առանցքային է ցանկացած սեռական հարաբերություններում: Միշտ հարգի՛ր քո զգացմունքներն ու անձնական սահմանները և արա՛ նույնը քո սիրելի մարդու հետ: Ազատ ներկայացրո՛ւ քո զգացմունքները և առանց քննադատելու լսի՛ր զուգընկերոջդ զգացմունքների մասին: Փոխադարձ հարգանքը օգնում է վստահության և փոխըմբռնման հիմքեր ստեղծելուն՝ դարձնելով ձեր հարաբերություններն ավելի ամուր: