Իգական արտաքին սեռական և վերարտադրողական օրգաններ
- Մեծ սեռաշուրթերը մաշկի արտաքին ծալքեր են, որոնք ծածկում են և նաև պաշտպանում փոքր սեռաշուրթերն ու արտաքին սեռական օրգանների այլ հատվածները: Յուրաքանչյուրի մոտ դրանք կարող են լինել տարբեր գույնի, չափի և ձևի, ինչպես նաև մի սեռաշուրթը կարող է տարբերվել մյուսից: Սեռական գրգռման ժամանակ մեծ սեռաշուրթերը կարող են փքվել և փոխել գույնը: Մեծ սեռաշուրթերը ծածկված են ցայլքի հատվածում աճող մազերով, որոնք նուրբ մաշկը լրացուցիչ պաշտպանում են անմիջական հպումներից։
- Փոքր սեռաշուրթերը շրջափակում են հեշտոցային բացվածքը և ծածկված են մեծ սեռաշուրթերով: Ի տարբերություն մեծ սեռաշուրթերի՝ դրանք մազածածկույթ չունեն և նյարդային վերջավորությունների մեծ խտության պատճառով սովորաբար ավելի զգայուն են: Այս նյարդային վերջավորությունները նպաստում են սեռական ակտից հաճույք ստանալուն: Ինչպես մեծ սեռաշուրթերը, այնպես էլ փոքրերը յուրաքանչյուրի մոտ կարող են տարբեր լինել՝ վառ արտահայտված կամ էլ, հակառակը, ներս ընկած: Կարող են նաև իրարից տարբեր լինել, իսկ սեռական գրգռման ժամանակ նույնպես կարող են փոխել գույնն ու չափերը: Փոքր սեռաշուրթերի մոտ գտնվում են բարտոլինյան գեղձերը, որոնք արտադրում են հեշտոցային բացվածքը խոնավացնող արտազատուկ:
- Հեշտոցամուտք․ սա դեպի հեշտոցի ներսը տանող բացվածքն է և գտնվում է միզածորանի բացվածքի ու հետանցքի միջև:
- Միզանցքը փոքր բացվածք է, որը գտնվում է հեշտոցամուտքի անմիջապես վերևում: Այն ծառայում է որպես անցուղի, որի միջով մեզը դուրս է գալիս օրգանիզմից: Քանի որ այն հեշտոցային բացվածքին մոտ է տեղակայված, ապա հիգիենայի պահպանումը և սեռական ակտիվությունից առաջ ու հետո միզելը, կարող է նվազեցնել վարակների հավանականությունը:
- Հետանցքը մարսողական տրակտի վերջում գտնվող բացվածքն է, որի միջով կղանքը մարմնից դուրս է գալիս: Այն գտնվում է հեշտոցամուտքի հետևում և կատարում է վերարտադրողական օրգաններից տարբերվող գործառույթներ։
- Ծլիկը փոքր, զգայուն նյարդային հանգույց է, որը գտնվում է փոքր սեռաշուրթերի միացման տեղում՝ միզածորանի բացվածքից վեր։ Այն պարունակում է բազմաթիվ նյարդային վերջավորություններ և հանդիսանում է սեռական հաճույքի առաջնային աղբյուր: Ծլիկը մարմնի միակ օրգանն է, որը ստեղծված է պարզապես հաճույք ստանալու համար: Այն ունի երկար արմատներ, որոնք հասնում են հեշտոցի մինչև մեկ երրորդ հատվածը և կպած են հեշտոցի ներքին պատերին: Այնպես որ ծլիկը շատ ավելի մեծ է, քան կարող է թվալ։
Իգական ներքին սեռական և վերարտադրողական օրգաններ
- Կրծքագեղձերը կենսական նշանակություն ունեն սեռական և վերարտադրողական առողջության համար: Յուրաքանչյուր կին ունի կրծքի յուրահատուկ առանձնահատկություններ, ներառյալ՝ տարբեր հյուսվածքներ, զգայունության հատվածներ, անհամաչափություն երկու կրծքերի միջև: Կրծքերը փոխվում են դաշտանային ցիկլի ընթացքում, տարիքի հետ, հղիության և կրծքով կերակրման ընթացքում: Պատանեկության ընթացքում սեռական հորմոնների զգալի ակտիվացման հետևանքով յուրաքանչյուր կրծքագեղձում սկսում է զարգանալ և չափերով մեծանալ կաթնարտադրող համակարգը: Վերարտադրողական ամբողջ ցիկլի ընթացքում յուրաքանչյուր կին ունենում է մոտավորապես նույն քանակի կաթնարտադրող հյուսվածքներ: Կրծքագեղձերի չափերի տարբերությունը պայմանավորված է նրանցում ճարպային հյուսվածքի քանակից: Սրանով է բացատրվում այն, որ կրծքերի մեծությունը կապ չունի դրանց սեռազգացողության կամ նրանցում արտադրվող կաթի քանակության հետ: Կարևոր է կուրծքը պարբերաբար զննել՝ հասկանալու համար, թե արդյոք կրծքերի հետ կապված խնդիրներ կան, ինչպես նաև դրանք ժամանակին կանխարգելելու համար։
- Հեշտոցը մոտ 8-12 սմ երկարությամբ մկանային խողովակաձև օրգան է, որը տարածվում է արգանդի վզիկից (արգանդի ստորին հատվածից) մինչև արտաքին սեռական օրգաններ։ Այն ծառայում է որպես դաշտանային արյան, սեռական հարաբերության և ծննդաբերության անցուղի։ Քանի որ հեշտոցը մկանային օրգան է, ապա կնոջ լարվելու դեպքում այն կարող է նեղանալ, իսկ եթե կինը հանգիստ է կամ ունի սեռական ցանկություն, ապա հեշտոցը կարող է լայնանալ և խոնավանալ: Բնական է սպիտակավուն կամ թափանցիկ, առանց սուր հոտի հեշտոցային արտադրություն ունենալը: Բորբոքային պրոցեսի դեպքում հեշտոցային արտադրության ծավալը կարող է շատանալ, փոխել գույնն ու հոտը: Նման իրավիճակում պետք է դիմել մասնագետի օգնության:
- Արգանդը սնամեջ, տանձաձև, մկանային օրգան է՝ մոտ 7-9 սմ երկարությամբ և 5 սմ լայնությամբ։ Այն գտնվում է որովայնի ստորին հատվածում՝ միզապարկի և ուղիղ աղիքի միջև։ Արգանդում հղիության ընթացքում զարգանում է պտուղը: Այն բաղկացած է երկու հիմնական մասից՝ արգանդի վզիկից, որը միանում է վերին հեշտոցին, և մարմնից, որը հղիության ընթացքում մի քանի անգամ մեծանում է, որպեսզի պտուղը տեղավորվի, իսկ ծննդաբերությունից հետո՝ վերադառնում իր սկզբնական չափին:
- Արգանդափողերը նեղ, 10-13 սմ երկարությամբ խողովակներ են, որոնք ձգվում են արգանդից մինչև ձվարանները։ Արգանդափողերն իրենց պատերի ռիթմիկ կծկումների շնորհիվ ձվաբջիջները ձվարաններից տեղափոխում են արգանդ։ Ձվաբջջի բեղմնավորումը տեղի է ունենում արգանդափողերից մեկում, ապա բեղմնավորված ձվաբջիջը տեղափոխվում է արգանդ, որտեղ այն ամրանում է արգանդի պատին: Երբեմն բեղմնավորված ձվաբջիջն ամրանում է արգանդափողին՝ առաջացնելով արտարգանդային հղիություն, ինչը կարող է շատ վտանգավոր լինել կնոջ համար։ Սա հազվադեպ երևույթ է, և կնոջ չբուժված սեռավարակները դրա առաջացման պատճառ կարող են դառնալ:
- Ձվարանները փոքր, նշաձև գեղձեր են, որոնք տեղակայված են արգանդի երկու կողմերում: Դրանք արտադրում են ֆոլիկուլներ, որտեղ պահվում են ձվաբջիջները և սեռական հորմոններ՝ էստրոգեն ու պրոգեստերոն։ Ի տարբերություն տղամարդկանց օրգանիզմի, որն անընդհատ սերմնաբջիջներ է արտադրում, կանայք ծնվում են սահմանափակ քանակությամբ ձվաբջիջներով, որոնց քանակը իրենց կյանքի ընթացքում չի շատանում:
- Միզապարկը, որտեղ հավաքվում է մեզը, մկանային օրգան է և գտնվում է միզասեռական ստոծանու վրա՝ արգանդից և հեշտոցից առաջ։
- Կուսաթաղանթը բարակ թաղանթ է, որը մասամբ ծածկում է հեշտոցի բացվածքը։ Յուրաքանչյուր կնոջ մոտ այն կարող է տարբերվել իր չափերով, ձևով է ունենալ մի քանի բացվածք: Կուսաթաղանթի գործառույթը լիովին պարզ չէ, թեև ժամանակին կարծում էին, որ այն պաշտպանում է մանրէների ներթափանցումից, սակայն դա հաստատող ոչ մի հավաստի աղբյուր չկա: Կուսաթաղանթը կարող է պատռվել առաջին սեռական հարաբերության ժամանակ, սակայն դա կարող է լինել նաև այլ պատճառներով, օրինակ՝ մարզվելիս կամ տամպոն օգտագործելիս: Որոշ կանայք առաջին սեռական հարաբերության ժամանակ չեն արյունահոսում և ոչ էլ ցավ են զգում, իսկ կան կանայք, որոնք ծնվում են առանց կուսաթաղանթի, և դրա առկայությունը կամ բացակայությունը չի վկայում սեռական ակտիվության մասին: